Tunduma TC Kuinua Uchumi wa Wanawake

Imewekwa : December 28th, 2023

Na Julius Evandino na Hajra Hashim, Tunduma TC

Kaimu Mkurugenzi wa Halmashauri ya Mji Tunduma, Belton Garigo, amewahakikishia Wanawake kuwa Halmashauri hiyo itaendelea kuwaunga mkono katika shughuli za kiuchumi wanazozifanya ili kuchochea maendeleo yao na Taifa kwa ujumla.

Garigo ameyasema hayo leo tarehe 28 Disemba 2023 wakati akifungua Kongamano la Jukwaa la Uwezeshaji Wanawake Kiuchumi lililofanyika kwenye Ukumbi wa Shule ya Sekondari Tunduma TC, Tunduma mjini.

Kiongozi huyo amewataka wanawake kuwa na maandalizi ya kutosha na mipango endelevu ya kukuza na kuendeleza fedha walizonazo na wanazotarajia kukopeshwa na Serikali  kupitia mikopo ya asilimia kumi ambayo itaanza kutolewa mara tu Serikali itakapotoa muongozo na utaratibu wa ukopeshaji baada ya kuisitisha kwa muda.

Aidha, Garigo amewasihi washiriki wa Kongamano hilo kuendelea kutoa elimu kwa Wanawake wenzao dhidi ya vitendo vya ukatili kwa jamii hasa watoto.

“Hivi karibuni tumekuwa tukishuhudia ukatili unaofanywa na wanawake wenzenu ikiwemo kutupa watoto na wengine kutelekeza familia zao.” Amesema Garigo.

Kwa upande wake, Mwenyekiti wa Jukwaa la Uwezeshaji  Wanawake Kiuchumi Mkoa wa Songwe, Zilpa Simchimba amewataka Wanawake kudumisha mila na desturi  kwa kuwa na heshima kwa wenza wao na kujishusha ili kuepuka migogoro isiyo ya lazima inayofanya familia zisambaratike na kusababisha watoto waishio mitaani na katika Mazingira magumu na hatarishi.

Uanzishwaji wa Majukwaa ya Uwezeshaji Wanawake Kiuchumi nchini yalizinduliwa  rasmi tarehe 06 Juni 2016 na aliyekuwa Makamu wa Rais wa Jamhuri ya Muungano wa Tanzania wakati huo ambaye kwa sasa ni  Rais wa Jamhuri ya Muungano wa Tanzania, Mhe. Dkt. Samia Suluhu Hassan lengo likiwa ni kuwakutanisha Wanawake katika ngazi zote za jamii ili kujadili fursa na changamoto zinazowakabili katika shughuli za kiuchumi.

Matukio katika Picha:

Kaimu Mkurugenzi wa Halmashauri ya Mji Tunduma, Belton Garigo akizungumza wakati akifungua Kongamano la Jukwaa la Uwezeshaji Wanawake Kiuchumi la Halmashauri hiyo lililofanyika kwenye Ukumbi wa Shule ya Sekondari Tunduma TC tarehe 28 Disemba 2023.

Mwenyekiti wa Jukwaa la Uwezeshaji Wanawake Kiuchumi Mkoa wa Songwe, Zilpa Simchimba akizungumza wakati wa Kongamano la Jukwaa la Uwezeshaji Wanawake Kiuchumi la Halmashauri ya Mji Tunduma lililofanyika kwenye Ukumbi wa Shule ya Sekondari Tunduma TC tarehe 28 Disemba 2023.

Mratibu wa Jukwaa la Uwezeshaji Wanawake Kiuchumi Halmashauri ya Mji Tunduma, Edward Mbembela akizungumza wakati wa Kongamano la Jukwaa la Uwezeshaji Wanawake Kiuchumi la Halmashauri hiyo lililofanyika kwenye Ukumbi wa Shule ya Sekondari Tunduma TC tarehe 28 Disemba 2023.

Matukio katika picha wakati wa Kongamano la Jukwaa la Uwezeshaji Wanawake Kiuchumi la Halmashauri ya Mji Tunduma lililofanyika kwenye Ukumbi wa Shule ya Sekondari Tunduma TC tarehe 28 Disemba 2023.