Madaktari Bingwa Wawasili Songwe

Imewekwa : September 30th, 2024

Katibu Tawala Mkoa wa Songwe, Happiness Seneda kwa niaba ya Mkuu wa Mkoa wa Songwe, Mhe. Daniel Chongolo, tarehe 30 Septemba 2024 amewapokea Madaktari 36 Bingwa na Bobezi wa Rais Dr. Samia Suluhu Hassan ambao watatoa huduma katika Hospitali zote tano za Halmashauri.

Seneda amewakabidhi kwa Madaktari hao kwa Wakuu wa Wilaya kwa ajili ya kwenda kuanza kazi kwenye Halmashauri zote tano. Madaktari hao watagawanyika katika makundi 5 ambao watakwenda kwenye kila Halmashauri.

Wataalam hao watatoa huduma kwa Wananchi kupitia Hospitali ya Halmashauri ya Mji Tunduma, Hospitali ya Halmashauri ya Wilaya ya Momba (Chitete), Hospitali ya Wilaya ya Ileje (Itumba), Hospitali ya Wilaya ya Mbozi (Vwawa) na  Hospitali ya Wilaya ya Songwe.

Kila kundi litakuwa na Daktari Bingwa wa Magonjwa ya Wanawake na Ukunga, Daktari Bingwa wa Watoto na Wabobezi wa Watoto Wachanga, Daktari Bingwa wa Upasuaji na Bobezi wa Mfumo wa Mkojo, Daktari Bingwa wa Usingizi na Ganzi, Daktari Bingwa wa Magonjwa ya Ndani, Daktari Bingwa wa Kinywa na Meno, Muuguzi Bingwa na Daktari Bingwa wa Mifupa.

"Matibabu  yatatolewa kwa kufuata utaratibu wa kawaida wa hospitali, wenye kadi zao za bima watatumia kadi, wenye uwezo wa kulipia huduma watalipia na wale ambao italazimika kutibiwa kwa msamaha nao watahudumiwa na hii ni kuhakikisha Wananchi wananufaika na ujio huu wa Madaktari wa Mhe Rais Samia Suluhu Hassan." Amesema Seneda.

Madaktari Bingwa watatoa huduma katika wa Hospitali hizo kwa muda wa siku saba kuanzia tarehe 30 Septemba 2024 hadi tarehe 06 Oktoba 2024 ambapo pia pamoja na mambo mengine watatoa mafunzo elekezi kwa Wataalam wa ndani.

Katibu Tawala huyo amemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa kutoa fedha zilizowezesha Mkoa huo kutoa huduma za mionzi kwenye vituo 13 ikiwemo huduma za CT - Scan ambazo tayari zimeanza kutolewa katika Hospitali ya Rufaa ya Mkoa wa Songwe.

"Tunamshukuru Rais Samia kwa maono yake katika kuboresha Sekta ya Afya, Wananchi tunaendelea kuiunga mkono Serikali katika juhudi zake za kutafuta afya bora kwa wote lakini pia nawapongeza Watumishi wa Sekta hii kwa kazi yenu ngumu ya kuwahudumia Wananchi." Amesema Seneda.

:

Chanzo: @mkoa_wa_songwe