Dirisha la Mikopo Lafunguliwa Tunduma

Imewekwa : September 30th, 2024

Na Benton Nollo, TTC

Katibu Tawala wa Wilaya ya Momba, Frank Nkinda amewaasa Wataalamu wa Maendeleo ya Jamii kutekeleza majukumu yao kwa uadilifu wakati wa mchakato wa utoaji wa mikopo ya Asilimia Kumi (10%) kwa vikundi vya Wanawake, Vijana na Wenye Ulemavu.

Nkinda ameyasema hayo wakati wa ufunguzi wa Mafunzo ya Usimamizi na Utoaji wa Mikopo kwa makundi hayo kuhusu Kanuni na Mwongozo wa Usimamizi wa Utoaji wa Mikopo kwa Maafisa Maendeleo ya Jamii, Timu ya Menejimenti ya Halmashauri ya Mji Tunduma na Kamati ya Wilaya ya Uhakiki wa Mikopo hiyo yaliyofanyika kwenye Ukumbi wa Mikutano wa Halmashauri tarehe 30 Septemba 2024 ambapo amesema Dirisha linafunguliwa rasmi tarehe 01 Oktoba 2024.

"Maafisa Maendeleo niwaombe mtambue kuwa mnapaswa kufuata taratibu zote za utoaji wa mikopo hii kwa uadilifu mkubwa. Ni lazima tuhakikishe kwamba kila kikundi kinachopokea mkopo kina sifa stahiki, na fedha hizi zinawafikia walengwa husika na si vinginevyo," Amesema Nkinda ambaye kwa mujibu wa Mwongozo ndiye Mwenyekiti wa Kamati ya Wilaya ya Uhakiki wa Mikopo.

Katika hatua nyingine, Maafisa Maendeleo ya Jamii wamepewa jukumu la kuhamasisha Wananchi kushiriki kikamilifu katika zoezi la kujiandikisha kwa ajili ya kushiriki Uchaguzi wa Serikali za Mitaa wa mwaka 2024.

"Pia, hakikisheni mnatoa elimu kwa Makundi hayo ili wajitokeze kujiandikisha na kushiriki katika Uchaguzi wa Serikali za Mitaa utakaofanyika tarehe 27 Novemba 2024 kwa wanavikundi wote watakaokuja kuchukua mikopo." Amesisitiza Nkinda.

Kwa upande wake Mkurugenzi wa Halmashauri ya Mji Tunduma, Mariam Chaurembo ameieleza Kamati hiyo kuwa mpaka sasa Halmashauri hiyo inazo shilingi bilioni 4.1 ambazo zinatokana na mapato ya ndani ya Halmashauri kwa ajili ya mikopo hiyo ya Asilimia Kumi.

“Mheshimiwa Mwenyekiti niwataarifu tu Wajumbe kuwa tangu Serikali ilipositisha utoaji wa mikopo hii mwezi Aprili 2023, tuliendelea kufuatilia marejesho kwa vikundi ambavyo tayari vilikuwa na mkopo lakini pia tuliendelea kutenga asilimia kumi (10%) ya fedha za mapato ya ndani, ambapo mpaka sasa dirisha linafunguliwa Halmashauri ya Mji Tunduma inazo shilingi bilioni 4.1, fedha ambazo mpaka kufikia tarehe 30 Oktoba 2024 zinatakiwa kuwa zimeshakopeshwa kwa makundi hayo kwa kipindi cha robo ya kwanza ya mwaka wa fedha 2024/2025.

Naye Mkuu wa Divisheni ya Maendeleo ya Jamii Halmashauri ya Mji Tunduma, Mwanaishamu Nassor ameeleza kuwa sababu iliyosababisha mikopo ya Asilimia Kumi (10%) kusimama kwa muda ilikuwa ni kufanya maboresho ya kanuni za utoaji mikopo ili mikopo inayotolewa iwe na tija kwa jamii.

"Maboresho yamefanyika katika suala la umri kwa upande wa vijana ambapo kwa sasa umri wa kijana umeongezeka kuanzia miaka 18 hadi miaka 45 wakati awali kigezo kilikuwa ni kuanzia umri wa miaka 18 hadi miaka 35 hivyo, marekebisho hayo yameongeza wigo kwa vijana wengi kupata mikopo hii.” Amesema Nassor.

Nassor ameeleza kuwa kigezo kingine kwa wanakikundi kupata mkopo huo ni kuwa na namba ya NIDA kwani uwepo wa namba hiyo utarahisha upatikanaji wa taarifa muhimu za mkopaji katika mfumo.

Ameongeza kuwa ili kuongeza ufanisi zaidi wa utoaji wa mikopo, Divisheni ya Maendeleo ya Jamii itafanya ukaguzi wa andiko la biashara husika, soko pamoja na kuangalia uhalisia wa biashara kabla ya kutoa mikopo kwa wakopaji kwani hii itasaidia kupunguza hasara kwa wanufaika wa mikopo hiyo.

Nassor amesisitiza wakopaji wote wa mikopo ya Asilimia Kumi (10%) watatakiwa kuhakikisha kuwa wanarejesha kwa wakati marejesho yao ili kutoa nafasi ya watu wengine kukopa.

 Mikopo ya Asilimia Kumi (10%) hutolewa kila robo mwaka kwa Wanawake, Vijana na Wenye Ulemavu, ili kuwasaidia kujiinua kiuchumi.

Matukio katika Picha: