BARAZA LA MADIWA LAPITISHA RASIMU YA SHERIA YA CHAKULA CHA MCHANA MASHULENI

Imewekwa : February 1st, 2022

Na, William Maganga Tunduma

BARAZA la Madiwani Halmashauri ya Mji Tunduma Wilayani Momba Mkoa wa Songwe wamepitisha Rasimu ya sheria ndogo ya uchangiaji wa chakula cha mchana katika shule zote za Serikali ili kupunguza utoro na kuongeza kiwango Cha ufaulu kwa wanafunzi.

Mwenyekiti wa Halmashauri ya Mji Tunduma Mhe. Ayubu Mlimba alisema wameamua kupitisha sheria hiyo kwa shule zote za Serikali za kutwa  wakiwa na lengo la kuwasaidia watoto wadogo kuanzia shule za awali mpaka Sekondari.

Alisema mkakati wa kutunga sheria ndogo hizo umezingatia matakwa ya sheria ya Bunge Kwa Tangazo la Halmashauri la Agosti 10, 2021 la nia ya kutunga sheria ndogo.

*”Sheria ndogo hii imejadiliwa na kamati za maendeleo ya kata kwa mujibu wa kifungu namba 81(1) Cha sheria ya Serikali za mitaa”* alisema Mlimba.

Alisema mchakato huo wa sheria utakapo pita baada ya kupelekwa ngazi ya Mkoa na hatimaye Bungeni utakapo rudi unawataka wazazi na walezi wa wanafunzi kuchangia debe mbili za mahindi na kilo kumi za maharage kwa kila mwaka ili kuwasaidia watoto wao wakiwa shuleni.

Mkurugenzi wa Mji Tunduma Philmon Magesa alisema sheria hiyo itasaidia  kwa kiasi kikubwa ongezeko wazazi na walezi kuchangia watoto wakiwa shuleni tofauti na ilivyo hivi sasa.

*”Suala la utoaji chakula kwa shule za Mji Tunduma mpaka hivi sasa linaenda kwa kusuasua ni asilimia 50 tu chakula hutolewa, suala la uchangiaji limekuwa likitumiwa kwa hiyali sasa tumeamua kutumia kifungu kinachotupa nguvu ya kutunga sheria, Ambapo hivi sasa uchangiaji chakula kwa shule zote za Serikali kuanzia awali mpaka Sekondari ni lazma na sio hiyari tena"* alisema Magesa.

Alisema umuhimu na sababu za kutunga sheria ndogo kuwa ni kuweka utaratibu wa uchangiaji wa chakula mashuleni unaizingatia utaratibu wa kisheria, kuwatia watoto motisha na kupunguza utoro mashuleni, kuongeza mahudhurio na ufaulu hasa mitihani ya Taifa pamoja na kuwarahisishia watekelezaji wa mpango wa uchangiaji chakula kusimamia utekelezaji kupitia utaratibu uliopo kisheria.

Mbunge Viti maalum mkoa wa Songwe Mhe. Neema Mwandabila alisema uchangiaji chakula mashuleni utekelezaji wake awali ulikuwa mgumu, huku akidai kuwa sheria hiyo walioipitisha Madiwani kuwa itasaidia kwa kiasi kikubwa kuongezeka uchangiaji na ufaulu kuongezeka.

Alisema Mkoa wa Songwe ni miongoni mwa mikoa inayoongoza kwa udumavu hivyo watoto kupata chakula shuleni kutasaidia watoto kuhimili masomo kwa muda mrefu.

Mwanasheria wa Halmashauri ya Mji Tunduma Adv. Timotheo Massawa alisema kupitia kifungu Cha saba (7) kinaeleza kuwa *mzazi au mlezi atakuwa ametenda kosa iwapo atashindwa au kukataa kwa makusudi kumchangia mtoto gharama za chakula Cha mchana*

"Kwa kupitia kifungu namba kumi (10) kinampa mamlaka mkurugenzi kutoza faini isiyozidi shilingi 50,000 kwa mtu yeyote iwapo mkosaji atakiri kosa kwa maandishi na kukubali kulipa faini iliyoainishwa chini ya sheria ndogo hii" alisema Massawa.